Noong Agosto 18, 2025, 144 na bata ang bininyagan sa Santa Rosa de Lima Parish Church sa ilalim ng programang Libreng Binyag ng Pamahalaang Lungsod.

Bahagi ito ng Responsible Parenthood Program ng City Nutrition Office (CNO) na nagtataguyod ng pagiging responsableng magulang at nagpapalakas ng suporta ng lungsod sa mga pamilya -- mula maagang pangangalaga hanggang sa masinop na pagpapalaki ng mga anak.

Naging matagumpay ang seremonya sa pagtutulungan ng lokal na pamahalaan, Simbahan, at mga magulang, na nagmarka ng bagong yugto ng pananampalataya at pag-asa para sa mga bata at kanilang pamilya. Ayon sa CNO, ang programa ay hindi lamang espiritwal na gabay, kundi paalala rin sa tungkulin ng mga magulang na patnubayan ang kanilang mga anak sa tamang landas.

Ipinahayag ni Mayor Arlene B. Arcillas ang kanyang kagalakan sa malawak na partisipasyon ng mga pamilya:
“Patunay ito na sa Santa Rosa, kaagapay ang pamahalaan sa bawat yugto ng buhay ng mamamayan -- mula sa pagsilang hanggang sa kanilang paglaki.”

Binigyang-diin din niya na ang binyag ay higit sa seremonya; ito ay sagisag ng pananampalataya at tanda ng walang kapantay na pagmamahal ng pamilya.

“Sa programang ito, ipinapakita natin na bawat batang ipinapanganak sa Santa Rosa ay mahalaga at karapat-dapat magsimula ng kanilang buhay sa ilalim ng biyaya at pagpapala,” dagdag ng alkalde.
Ang Libreng Binyag ay bahagi ng mas malawak na inisyatiba ng Lungsod para sa kalusugan, kabuhayan, at pamilya, katuwang ang iba’t ibang sektor ng komunidad. Para sa susunod na iskedyul at mga rekisitos, subaybayan ang mga opisyal na anunsyo ng Lungsod o makipag-ugnayan sa City Nutrition Office.