Punong-puno ng kulay, saya, at sigla ang matagumpay na pagdaraos ng ika-27 Sikhayan Festival noong Enero 18, 2026 sa City of Santa Rosa Multi-Purpose Complex Tennis Court. Sa temang “Buhay na Kultura tungo sa Komunidad na Masigla at Nagkakaisa,” muling pinatunayan ng Lungsod ng Santa Rosa ang buhay na diwa ng pagka-Rosense at ang patuloy na pag-usbong ng kultura nito sa pamamagitan ng makulay na parada at kahanga-hangang mga pagtatanghal.

Kasabay ng pagdiriwang ang ika-234 na Founding Anniversary ng Lungsod ng Santa Rosa, isang mahalagang yugto sa kasaysayan na sumasalamin sa matatag at tuluy-tuloy na pag-unlad ng lungsod sa paglipas ng mga taon.

Binigyang-diin ni Vice Mayor Arnold B. Arcillas na higit pa sa paggunita ng mayamang kasaysayan at kultura, ang Sikhayan Festival ay isang pagpupugay sa bawat Rosense na patuloy na nakikibahagi sa paghubog ng lungsod.

“Taon-taon, ini-aalay natin ang pagdiriwang na ito sa mga tagumpay na sama-sama nating binuo. Hindi lamang ito pagbabalik-tanaw sa ating mayamang kasaysayan at kultura, kundi isang pagpupugay rin sa bawat hakbang na tinahak ng Pamilyang Santa Rosa tungo sa mas maunlad, makatao, at inklusibong kinabukasan,” ani Vice Mayor Arnold.

Sa kanyang mensahe, pinasalamatan naman ni Mayor Arlene B. Arcillas ang bawat isa na naging bahagi ng kasaysayan at patuloy na pag-unlad ng lungsod.

“Sa pagdiriwang natin ngayong taon, ipinaaabot ko ang aking taos-pusong pasasalamat sa lahat ng nag-ambag sa pagbuo ng ating makulay na kasaysayan. Ang Sikhayan ay hindi lang pagdiriwang ng mga tagumpay, kundi isang paalala na kapag tayo ay nagtutulungan, walang imposibleng layunin.”

Itinampok bilang pangunahing atraksiyon ng pagdiriwang ang Street Dance Competition, na taun-taong inaabangan at nagsisilbing puso ng Sikhayan Festival. Ipinamalas ng anim na grupong kalahok mula sa iba’t ibang pribadong paaralan ang kanilang husay at talento sa pagsayaw, pati ang malikhaing interpretasyon ng kultura, kasaysayan, at tradisyon ng lungsod.

Sa huli, itinanghal na Grand Champion ang Dominican College of Santa Rosa, habang Holy Rosary College of Santa Rosa naman ang nagkamit ng 1st Runner-Up. Ang Queen Anne School of Santa Rosa ang nagwagi ng 2nd Runner-Up; Jesus the Exalted Name School ang 3rd Runner-Up; Blessed Christian School de Sta. Rosa ang 4th Runner-Up; at Citi Global College Santa Rosa Campus ang 5th Runner Up.

Hindi rin nagpahuli ang mga makukulay at detalyadong kasuotan na lalong nagbigay-buhay sa parada at mga pagtatanghal. Dahil dito, ginawaran ang Holy Rosary College of Santa Rosa bilang Best in Costume, habang kinilala ang Dominican College of Santa Rosa bilang Best in Street Dance at itinanghal din ang kanilang kinatawan bilang Reyna ng Sikhayan, patunay ng kanilang pambihirang galing at kabuuang pagtatanghal.

Ang ika-27 Sikhayan Festival ay hindi lamang pagdiriwang ng sining at kultura, kundi isang matibay na paalala ng talento, pagkakaisa, at pagmamalasakit ng bawat Rosense. Sa pagdiriwang ngayong taon, patuloy na pinagtitibay ng lungsod ang isang komunidad na masigla, nagkakaisa, at may buhay na kultura,para sa susunod pang mga henerasyon.

Karagdagang Impormasyon:
PTV - #SentroBalitaWeekend | Paggunita sa 27th Sikhayan Festival sa Sta. Rosa Laguna, naging makulay at masigla | ulat ni Louisa Erispe:
https://www.facebook.com/reel/1376634593582391
ABS-CBN News - Isang street dance ang isinagawa sa Santa Rosa City sa Laguna bilang pagdiriwang ng ika-27 taon ng Sikhayan Festival.
https://www.facebook.com/reel/1147382460606966
Santa Rosa City Government - TINGNAN | SIKHAYAN FESTIVAL 2026 PARADE
https://www.facebook.com/santarosacitygovernment/posts/pfbid02YJtASJxrJetztxFPJ1WGn7DwWDvNjo7ToimoPrpRBtZo2AjYXLpeAALn5pMyLrhwl
Kitkat.Adventour - ATM: SIKHAYAN PARADE
https://www.facebook.com/santarosacitygovernment/posts/pfbid029QT6ZpjBmzA3X1oC19i1cJyZ9FVa9gjm8vx9arYkcdXpVtWpvYmGqLS7yntgcifQl