Masiglang ipinagdiwang ng City Social Welfare and Development Office (CSWDO) ang National Nutrition Month noong ika-1 ng Agosto 2025 sa pamamagitan ng iba't ibang aktibidad na naglalayong itaguyod ang kahalagahan ng wastong nutrisyon para sa kalusugan ng bawat mamamayan.

Kabilang sa mga tampok na programa ang Nutri Star Child kung saan pinangunahan ang pagkilala sa mga batang may pinakamainam na kalagayan sa nutrisyon. Isinagawa rin ang Draw and Tell contest na nagbigay daan sa mga bata na ipahayag ang kanilang kaalaman sa wastong pagkain sa malikhaing paraan sa pamamagitan ng pagguhit at pagkukuwento.

Bukod dito, naging masigla rin ang isinagawang Zumba session na nilahukan ng mga ina. Layunin naman nitong itaguyod ang aktibong pamumuhay bilang bahagi ng kabuuang kalusugan.

Ang selebrasyon ay bahagi ng taunang obserbasyon ng National Nutrition Month na may layuning paigtingin ang kaalaman at kamalayan ng publiko tungkol sa tamang nutrisyon, lalo na sa mga kabataan at pamilya sa komunidad.

Isa lamang ang CSWDO sa mga tanggapang patuloy na nagsusumikap sa pagbibigay ng mga programang nakatuon sa kalusugan, kapakanan, at kaunlaran ng bawat pamilyang Santa Rosa.